當前晚大多數球迷住個電視睇亞冠盃、德盃、意甲或者英聯盃之際，我求大俠就黐住個電腦睇瑞超希爾星堡迎戰佐加頓斯，因為呢場係我偶像軒歷拿臣（拿臣）掛靴前最後一場主場比賽；睇到拿臣賽後喊晒咁同球迷揮手，我求大俠都眼濕濕。
生於71年9月嘅拿臣，可以話係陪住我求大俠成長嘅球員；記得我入行之初，亦係拿臣嶄露頭角之時。記得當時係93年，拿臣啱啱喺希爾星堡出國搵食，轉會荷甲飛燕諾；司職翼鋒嘅佢將長長金髮紮成辮子頭，喺邊線話去就去，真係型。到94年，佢仲協助瑞典成為世界盃季軍。
拿臣喺97年轉會蘇超些路迪，為球會立下唔少汗馬功勞。隨住年齡漸長，佢竟然越踢越前，做埋正前鋒；就算99/00球季重創斷腳，拿臣復出後依然勁，但就由辮子頭變咗光頭黨。
「今次百分百肯定退休」
04年夏天，拿臣以年過30嘅高齡加盟巴塞隆拿，以表現證明自己寶刀未老，仲幫巴塞喺06年奪得歐聯。之後佢重返希爾星堡，但於07年1月歇冬期外借到英超球會曼聯，亦有出色表現。
由於拿臣曾經試過兩度復出救瑞典國家隊，所以唔少人對佢今次掛靴抱保留態度，但佢就話：「我百分百肯定自己今次會退休，我已38歲，喺綠茵場上嘅日子都夠喇！我會好好考慮自己未來路向，但我首先要做嘅係適應退休生活。」
雖然拿臣實牙實齒話會退休，但佢一向係救亡英雄，加上佢有心喺退休後修讀教練課程，我求大俠就建議佢考到牌之後，考慮救吓日走下坡嘅瑞典或者些路迪啦！
AIK煞科戰決鬥哥登堡
講返周三瑞超，佐加頓斯2:0贏咗希爾星堡之後，護級露曙光，有機會踢留級附加賽。前列方面，榜首AIK蘇納主場只能打和奧雷布洛1:1，要喺煞科戰作客「2哥」哥登堡，決定今屆瑞超冠軍誰屬。
軒歷拿臣曾效著名球會
飛燕諾（93-97）、些路迪（97-04）、巴塞隆拿（04-06）、曼聯（07、借用）、希爾星堡（06-09）