江若琳和周柏豪在新片《關人7事》中扮演情侶，爛賭男周柏豪威迫女友援交賺錢。江若琳表示寧願被打被蹧躓，也不會為男友做援交，更指男仔好犯賤，對他太好就會煩。
由彭發執導、年輕演員江若琳（Elanne）、周柏豪、周秀娜和趙碩之等主演的新片《關人7事》下月5日上映。《關》片由7個故事組成，Elanne和周柏豪扮演日嘈夜嘈的情侶，柏豪更演繹爛笪笪病態賭徒，不時死纏難打，威迫任職啤酒妹的女友Elanne做援交賺錢為他還債。周柏豪日前說：「我拍之前都有睇過啲病態賭徒訪問，自己都有朋友賭錢，仲幫過佢少少。」
被嘲眼角高
現實生活中，Elanne堅決表示不接納另一半威迫她做援交，嫖賭飲吹也絕不接受，她說：「如果發現到就即刻飛咗佢。導演寸我話我搵唔到男友，因為要求太高，但我覺得呢啲係終生幸福，如果我真係好愛佢，我寧願被打、被蹧躓囉，援交呢啲已經去到底線，女仔要好好保護自己。」
Elanne和周柏豪老友鬼鬼，柏豪笑指如果要撻着，一早已發展，但不想失去好友，他笑說：「佢咁靚，連我阿媽都讚佢靚同乖女。」Elanne禮尚往來說：「我哋好friend，冇諗過呢個問題，佢係好男仔，但太靚仔都驚好多女仔黐埋去，因為男仔好犯賤，對佢太好佢會煩。」
採訪：駱華齡 攝影：陳慧安
服裝、飾物：MissSixty、CeliaofDadaStylingClub（江若琳）、induhomme（周柏豪）、ThomasSabo