煲呔「家醜」全城矚目，泛民五區總辭問題被冷落，「金牌莊家」詹培忠噚日同八方飯局時，買重注泛民唔會總辭，揚言如果泛民真係五區總辭，佢奉陪到底，跟隊第六個人辭職，空降港島區補選，一於玩鋪勁。
賭泛民係盤散沙
總辭玩埋一份，金勞詹話係為啖氣，「夠膽講就要夠膽做，等佢哋唔好信口開河！」金勞詹認為總辭唔成事，因為睇死泛民一盤散沙，「最多三區辭職，何俊仁（民主黨）、馮檢基點會辭？」既然吼準對家唔會晒冷，呢位「政壇賭神」亦無有怕allin，「我有信心唔會輸得好難睇，就算落選，咪當提早兩年退休囉！」
五區總辭十畫未有幾撇，華叔五人名單卿姐、何姨姨、李卓人、毓民同梁家傑未有動靜，金勞詹卻連競選口號都度好，「頂龍呃你一票！」佢解釋口號係諷刺廿幾個泛民玩弄民意，事關佢只有一票，就算選民俾佢欺騙，損失都無上泛民當咁大犧牲，單係輸少當贏呢一點，已經值得考慮投佢一票咁話。
金勞詹又稱自己去九龍東、新界西直選都有勝算，因為兩區多潮州人，有「格己冷」票墊底已經唔輸得，佢更透露工聯會嫻姐都磨拳擦掌準備出山，所以泛民總辭牌面輸九成，呢鋪值唔值博，真係要諗清楚。
如果金勞詹真係照跟泛民辭職，八方唔敢話佢輸硬，但點計贏面都唔算高，不過佢本錢厚，唔志在，點解咁講？事關佢10.1無去天安門睇閱兵，轉戰拉斯維加斯，聲稱又執到千幾萬，花幾百萬元玩補選，一旦偷雞贏咗，就一鋪過面子、銀紙本利歸來，輸咗亦唔入肉，大不了唞兩年再選過啫。
飯聯盟機制已定
講完賭博，金勞詹講番幾句正經嘢，透露保皇派「飯聯盟」機制已定，每月一次飯局，每位200蚊，幾個黨派輪流包底，佢話最大收穫係同中指黃宜弘冰釋前嫌，之前中指黃以為佢投票卿姐做財會主席而唔睬佢，有次飯局兩人互隊茅台，卒之杯酒釋懷。
mailto:[email protected]