升呢後嘅Angelababy噚日到尖沙嘴宣傳htc新款手機，雖然現場仲有兩位女模，但明顯Angelababy先係主角，兩位女模只屬陪襯品。
Angelababy最近忙於喺內地拍新片《花田囍事2010》，喺片中佢會女扮男裝，日前佢仲將自己嘅男仔造型喺模特兒公司老闆嘅生日派對上曝光，佢自爆琦琦睇完佢個男裝打扮後即時話Baby似台灣型男張震，雖然俾人話似男仔，但Baby就冇唔開心，仲話：「起碼張震係靚仔，唔知當地嘅女仔會唔會鍾意我呢？」
早前Baby亦為《花》劇拍攝咗一場濕身戲，雖然佢拍前已做足準備，全身包晒保鮮紙保暖，但係都唔小心冷親，不過好彩我就冇發燒，亦都唔係豬流感。
預咗傳分手
未知Baby最近係唔係工作太忙關係，加上升呢後嘅Baby唔希望成日將感情事掛喺口邊，所以近日同Baby提及男友陳偉霆（William）時，佢都表現得好鬼避忌，仲話同佢好耐冇見，又話抗拒用情侶手機同放相喺手機內，又話William亦都冇嚟過探佢班，令人即時揣測兩人感情生變，不過Baby就稍作保留話：「大家身邊都有好多朋友，有聚會都見到，要傳分手都冇辦法，我預咗呢啲新聞。」