泛民喺議事廳展示抗議牌似成常態，唔少保皇黨睇到眼火爆，迫逼主席曾鈺成做嘢，但阿曾以《議事規則》無明文禁止舉牌為由唔阻止泛民，阿曾黨友似乎嫌阿曾太軟弱，劉江華噚日喺立法會開始辯論施政報告時，舉手投訴泛民展示嘅爭取全民養老金「樹葉形」請願牌阻住佢視線，要求主席處理。
民主黨張文光好勞氣，反駁劉華指去大球場睇波都會俾人遮住視線啦，你又唔係植物人，自己就吓位咪得囉。不過劉華堅持示威牌阻住，要求泛民借歪，至此曾主席終於出聲，幫理不幫親咁話，《議事規則》冇話唔畀舉牌，議員唔該合作啲，辯論期間減少枝節，包括樹葉，阿曾呢個爛gag引起哄堂大笑，多聲氣嘅劉華惟有收口。