唔知係唔係因為股市樓市暢旺，呢排在中環搵過海的士相當困難。記得約一個月前，放工時間中環置地廣場LV外面嘅畢打街，經常有兩至四架過海的士等客，但最近兩三個星期嘅黃金時間，搵架睇吓都冇。最初以為有俗稱「o架啡佬」嘅交通督導員在此趕的士，但唔係吖，睇唔到附近有o架啡佬喎，過海的士去咗邊呢？呢日我等咗一大排，卒之「輪」到一架，上車後司機大哥自言近來生意甚好，唔憂做，夜更司機更知道去邊度等客，就係酒吧林立嘅地區！司機大佬話：「多謝警方捉啲飲酒客，現在好多人都唔敢揸車去飲，全部搭的士，於是我地多咗好多生意──載客去酒家，又由酒家載佢地返屋企。」
司機所言，有啲道理，左丁山唔揸車上班，已有一段日子，故此晚上吃飯，比較放鬆飲紅酒，有車之人，當然會全部窒住窒住，有部份人更加一啖都唔飲，此亦明哲保身之道也。但成班老友坐埋，有人飲有人不能一齊浮一大白，好似有啲唔夠爽噃。何謂「浮一大白」，八卦公賜官有答案，佢話畀左丁山聽，佢本一九九五年舊著《提防考起》本由天地圖書出版，今年讓出版權，改由次文化堂出版；適逢通識教育盛行，佢呢本書居然賣得唔錯，因為不少學生與老師皆怕「通識統統唔識」也。據賜官在書內解釋，「浮一大白」的「浮」字原來解釋是「罰」，而「白」是用來罰酒的酒杯顏色，古時平常喝酒用有顏色的杯，多用藍色，只有罰酒先至用白色杯，沿用至今，「浮一大白」不再指罰酒，而是指飲一大杯酒！
原來如此，賜官呢本書《提防考起》載入幾百條詞句，有解釋，有根據，每句都識，但未必一定知道詞句之來源：譬如「陸榮廷睇相，唔衰攞嚟衰」，陸榮廷真有其人，民初廣西督軍，後為廣東督軍，兩廣巡閱史，是富貴大官一名。佢有一次故意扮潦倒，穿着破衣去睇相，故意「唔衰攞嚟衰」，點知睇相佬一睇就看穿佢係大富大貴之人。呢本賜官舊書新版，內容饒有趣味，左丁山睇得嘻嘻哈哈，中四學生豪原來已經讀完呢本書，於是大家一齊討論，過足癮！