立法會噚日辯論施政報告內容，樓價發癲係焦點之一，地產界議員石禮謙責之所在維護地產商，反駁市民抱怨買唔到樓時，無啦啦扯埋余若薇落水，指余大狀平日粗用個Chanel手袋閒閒哋廿幾萬元，意指仲有好多人好有錢負擔到樓價。
只見到余大狀聽到擰晒頭，堅決否認個靚袋天價咁貴。石禮謙要求余大狀拎個手袋出嚟俾大家睇睇，余大狀笑笑口婉拒，石禮謙轉而向鄰座鼠王芬求助，叫佢拎個手袋出嚟，以示大把人用貴嘢。
點知石禮謙一拎起鼠王芬個袋，就直指係廟街貨，鼠王芬即時否認購於廟街，澄清手袋喺紐約買，石禮謙再話見唔到牌子喎，好似女人街貨色，搞到議事廳哄堂大笑。鼠王芬係九西議員，幫襯廟街、女人街好失禮咩？