「想買樓，搵葉劉！」呢句風行一時嘅官場順口溜，估唔到家陣仲適用。跟咗葉劉做嘢三年嘅女助理，近排轉職康文署博物館，人工升幅可觀，葉劉大手筆加人工都留佢唔低，負責為葉劉研究政治問題嘅男助理，早前亦另有高就，既然升職加人工，買樓指日可待啦！
幾百人爭做助手
雖然短期內兩名愛將求去，不過葉劉話下屬有好出路，可喜可賀至真。立法會復會，葉劉噚日請記者食嘢時笑言自己條命可能真係旺下屬，李少光有辦你睇，「翻閹」做副局長嘅黎棟國係新鮮熱辣例子，日後長俸連月薪月入廿幾卅萬元，睇怕遲早肥到襪都着唔落。
可能因為近排多人想買樓，所以葉劉招聘兩個助理反應極度踴躍，有逾300人應徵，葉劉最終揀咗一名喺領匯做公關嘅女將，同一名少男做政治研究工作，據講囡囡都有幫吓眼。佢話新女將上一份工係領匯公關，有唔少俾人鬧嘅經驗，相信可以輕易適應立法會工作。