在剛過去的書展中憑噴血寫真殺敗全港o靚模的人氣icon周秀娜，在考試車場上竟變成騰雞娜。昨早她現身跑馬地處女考牌，但全程驚到震，居然盲舂舂衝入男廁；到考路試時，先在場內轉彎唔夠位，駛出街頭時又因避菲傭勁煞車，兩大死因致考牌肥佬。娜姐手執成績單欲哭無淚，忍不住當場悲愴慘叫。
人氣o靚模周秀娜（Chrissie）自從在暑假上位後，接job接到手軟，由朝到晚都靠伸手牌坐的士代步，每月車費坐底5,000大元。所謂小數怕長計，周秀娜一直恨考車牌，希望盡快成為有車階級，所以近月她開始做學神，跟隨葉翠翠的教車師傅秘密練兵。昨日，24歲的娜姐終於踏上處女戰場，一早現身跑馬地的駕駛考試中心考牌去。
考牌官代煞車
昨早10時，戴黑框眼鏡遮素顏、穿風褸襯牛仔熱褲的Chrissie匆匆到達考試車場，會合已在場的教車師傅，見她一面緊張，不時左顧右盼，其後師傅帶她辦理登記手續及領取兩個分掛車頭和車尾的「駕駛考試」車牌，接着兩人走到車旁等候考牌官。神情僵硬的Chrissie表現驚青，中途她人有三急，竟盲頭烏蠅舂入男廁解決，至如廁後她也未為意。
考牌官到場時，Chrissie如臨大敵坐上司機位，開始進行路試。她先在場內考三手軚掉頭，雖然動作超慢但極之小心，緊接考泊位也順利完成。繼而她駛離試場，未料她在場內一轉彎位出事，響晒軚唔夠位，上斜路又窒窒吓；到駛出路面後，其間一名菲傭突然過馬路，Chrissie反應未夠快，考牌官見狀隨即為她踩煞車掣，而考牌官這一腳，就令她肥佬收場。
昨日Chrissie考牌時間約15分鐘，她駕車返試場不久已取得成績表，但其表情僵硬，失望兩字如鑿額頭，一睇已知唔pass，在旁的教車師傅說：「係阿sir幫你踩brake，太接近其他物體，個菲傭呀。」
記者問Chrissie是否不滿成績？她未有理會，只追問師傅：「係咪唔係一take過呀？」師傅說：「係呀。」她聞後即凄厲地慘叫一聲，喃喃自語：「我應該一早踩brake！」然後她向記者苦笑說：「任務完成，好唔滿意，算啦，下次考過。」
呆望試卷返歸
最後駕車師傅載Chrissie去銅鑼灣，沿路她仍盯着試卷發呆，抵埗後她轉搭的士返西環寓所。至傍晚她換上低胸裙，到時代廣場出席ROJITA品牌開幕禮，大會指她因塞車故遲到近45分鐘，姍姍來遲的Chrissie強調自己是依大會指定時間到達，不過她也向記者致歉，更講爛gag說：「好對唔住大家，係咪話我塞咗落個窿度，喺個窿度捐番出嚟？」看來她已調節考牌肥佬的心情，打算再戰車場。
採訪、攝影：黃曉程、楊浩賢、胡比、仇志德
小八卦：同一師傅 翠翠一take過
周秀娜的教車師傅葉先生，聲稱之前教過港姐葉翠翠（圖），揚言她一take過考牌成功，是其得意門生，記者指葉翠翠揸車頗辣，葉師傅說：「你見到佢咩？佢好似揸波子喎，聽啲人講。」昨日周秀娜考牌前，他說：「佢OK，冇問題嘅。」周秀娜場內考三手軚掉頭時，葉師傅誇下海口說：「呢個唔使驚，佢噚晚做得好靚。」但話口未完，周秀娜卻一度死軚。
娛圈學神：曹敏莉考6次先掂
周秀娜第一次考牌失利，反觀同屬o靚模、不過現已升呢為模art的JaniceMan（文詠珊）卻一take過考到牌，至於城嫂熊黛林在男友郭富城教路下，考自動波學足32個鐘，也是一次搞掂，大家同屬model，看來周秀娜真係要向同行取經。不過屢戰屢敗的學神，在圈中仍大有人在，如港姐曹敏莉（圖）當年在美國考牌5次都未能成功，最後一次考到但一樣渣，最弱係泊車睇位。至於雙喜臨門的徐淑敏，雖然駕駛技術麻麻，不過考棍波一次即pass。
