仲有兩日先到萬聖節，估唔到西方嘅鬼門關，率先已經喺周二西班牙盃大開；來自丙組仔嘅「惡鬼」艾高干，竟然爆大冷主場4:0大炒西甲隊皇家馬德里，勁開300倍波膽！我求大俠建議皇馬呢支億萬鎊大軍，不如喺萬聖節嗰日扮「醜死鬼」啦！呢鑊輸得咁樣衰！
大家實覺得皇馬輸得咁甘，肯定喺西盃出晒o靚仔踢啦。哼，我求大俠睇番佢哋第4圈首回合個正選陣，發現魯爾、賓施馬、雲達華治、艾比奧爾同古迪等猛料人物壓陣，堂堂9屆歐聯冠軍，對住丙組仔都輸夠4粒，簡直係醜到冇人有！仲有呀，艾高干全年嘅班費只係120萬歐元，屈指一算足足少皇馬成300倍㖭！
爆勁冷300倍波膽
皇馬大敗呢單嘢喺西班牙嗰邊仲大迴響，據《馬卡報》寸爆嘅報道指出，皇馬呢場波嘅人腳，加加埋埋國家隊喼帽有成465頂咁多，當中所有隊員嘅獎牌數目，都有95個！講真，基斯坦奴朗拿度、卡卡、沙比阿朗素同沙治奧拉莫斯等主力缺陣，根本已構唔成輸波藉口，仲要輸夠4球？
最慘係呢幾年喺後備席雪到硬晒嘅2號龍門杜迪克，今場代替卡斯拿斯正選把關，就俾丙組仔艾高干入夠4粒。聽西班牙嘅行家講，如果唔係杜迪克救出好幾個必入球，皇馬輸「主其他」（200倍）波膽都有份！不過，家陣艾高干淨勝4:0，開300倍波膽仲好分。唔講唔知，嚴格嚟講艾高干都算係位於馬德里市南部嘅球隊，嗰度係工業城市，連佢哋主場杜明高球場都坐得嗰3,000人，皇馬冇得好怨咯。
比歷連奴：輸得肉酸
計埋皇馬上場聯賽悶和希杭0:0，已經連續兩場冇波入，教頭比歷連奴賽後話：「唉！家陣我真係覺得好鬼肉酸，好鬼尷尬，輸波完全冇藉口囉！」好彩西班牙盃兩回合制，下個月11號主場再對艾高干，皇馬可以報番仇，定係再做多次醜死鬼呢？