閉門造車搞出燈膽券措施，引起特首疑似益親家醜聞嘅環境局局長邱騰華近日頭頭碰着黑，照計應該搵方法旺吓自己，偏偏佢好似十分忌光，直情見光就閃。
參觀路線迴避慳電膽
邱騰華噚日去赤鱲角亞洲國際博覽館，主持第四屆國際環保博覽開幕儀式，禮成後佢循例喺會場巡視吓，參觀新式環保設施，現場消息話，收到風局長近來怕光，所以特別安排一條唔見得光參觀路線帶局長遊花園，保證沿途唔會見到刺眼嘅慳電膽。
現場所見，邱騰華又真係好似十分知碇咁，冇行近展示慳電膽攤位，走咗去澳門環保局個攤位打招呼，可能真係整定，澳門環保局攤位旁邊，赫然就係展出LED燈膽嘅攤位，邱騰華避無可避，俾啲LED燈膽「燦」到正。
原來呢間公司趁機嚟香港推銷產品，連澳門政府都接觸過佢哋，考慮出年起喺部份政府建築物同公家設施試用LED燈。澳門環保步伐隨時快過香港，邱騰華家陣先鼓吹市民轉用含水銀慳電膽，被指無知兼落後，因為LED燈仲環保，呢間公司負責人唔知攞景定贈興，向佢力銷LED燈比一般慳電膽節省最少五成電力，雖然俾幾十盞燈照住，不過邱騰華塊面卻黑氣乍現，氣氛好詭異。
展覽商招呼局長參觀
旁人睇到局長眉頭眼額唔多對辦，即時前呼後擁拉邱騰華離開，可惜禍不單行，行唔夠幾步，又有展覽商招呼局長參觀，呢次竟然又係介紹LED燈！唔好話邱騰華，真係連八方見到都火滾，係人都知LED慳電過慳電膽啦，使唔使講咁多次呀，仲唔係想惡意中傷慳電膽！環境局的而且確係無中生有搞出呢張燈膽券，慳電膽唔夠慳電又點!?四叔都有講，你吹脹佢咩！
mailto:[email protected]