成龍成日叫人駛出真功夫做大師傅，但要做真正大師傅邊有咁易呢！事隔6年再發教車師傅牌，單係GP1組別，都有3萬人爭347個牌，百分之一嘅機會，仲要一肥即Out無得留低，唔搵大大大師傅過定兩招點得呀！
記者：許維雅
攝影：梁細權
Model：Debbie@Puremodels
第一關：筆試
駕駛教師考試其實同普通駕駛執照考試一樣，大致分為兩部份，先考筆試，再考路試，不過師傅牌就要喺30分鐘之內回答110條選擇題，以書面形式作答，要答對105條或以上先為之及格。即係答錯6條即Out，無補考機會。相對普通執照筆試只係答20條，難度的確大好多，香港駕駛學院車隊培訓及發展經理謝錦華就教定大家以下8招。
第一招：唔好急 最緊要快
謝Sir：「大部份考生肥佬都係因為唔夠時間作答，平均16秒就要答一條，真係諗多陣都死。因為書面作答容易返轉頭，所以真係唔識就跳咗佢先，有時間再返轉頭諗，以免自己答到尾聲時唔夠時間影響心情，越心急仲越容易答錯。」
第二招：唔止死背 仲要理解
謝Sir：「作為一個教車師傅，要知道嘅路面知識應該要更全面，由最基本嘅路牌指示、駕駛導師牌照費用，到較複雜嘅道路交通條例（香港法例第374章）都要知得一清二楚，最常問嘅包括學車時間、咩地方學牌唔入得等等，由於內容太多，唔單止要死背，仲要多理解，方便考試時作答得更快。」
第三招：機械結構都要識
謝Sir：「筆試內容仲包括汽車結構同機械知識，可能啲人覺得又唔係考整車，點解要問呢啲，但汽車機械上嘅結構問題好多時直接影響揸車，好似離合器同波箱嘅關係，聽到波箱發出怪聲你會唔會知咩事，因為教車師傅應該懂得處理一啲簡單基本嘅壞車問題。」
第二關：路試
筆試及格，運輸署就會發信通知考生路試嘅時間，每人可申請延期一次。考試時間大概45分鐘左右，除咗考L形同S形泊位、窄路掉頭等基本功，最難莫過於要有15分鐘駕駛評述，一邊揸車一邊講解路面情況同你將會點做，香港駕駛學院就搵咗林Sir親自示範。
第四招：熟練培正道
林Sir強調一定要好熟路面環境先容易做得到駕駛評述。考場位於何文田培正道，由於須要兼顧駕駛評述，所以最好十分熟悉嗰區環境，方便應對突發事件做出反應。
第五招：記口訣多練習
林Sir示範時，熟練程度快到好似講馬咁，有多句重複出現嘅口訣，好似「右中左嘅道路情況無問題，我準備入波。」、「再望兩邊側鏡，我家準備畀油開車。」邊講邊做嘅技巧十分難，林Sir：「開頭佢哋唔識講就叫佢跟我講，記熟口訣之後就鼓勵考生平日搭車都要坐車頭自己多練習。」
第六招：要成熟穩重 又要風趣幽默
謝Sir：「衣着打扮成熟穩重當然重要，以示一種尊重。」但問到路面評述時要唔要講得風趣幽默啲，謝Sir認為一定有着數：「若然你講到好似曾志偉咁生鬼，考牌官自然開心啲，亦會覺得你日後做教車師傅時同學生溝通有一定嘅能力，不過當然唔好講到離晒題啦。」
唔好怕口水多，同考牌官多溝通先有着數。
第七招：唔怕Showoff
有人話考牌官唔鍾意考生太Showoff自己嘅揸車技巧，謝Sir就覺得考師傅牌應該啱啱相反：「大部份考牌官都覺得做得教車師傅就應該揸車要有一定技術，所以唔怕Showoff，最好表現出反應快夠爽快，遇到行人亂過馬路等突發情況時最緊要定。」
第八招：轉波順 入彎準
揸車時望遠啲當然係第一誡，最好有咁遠望咁遠，林Sir更提醒大家轉波時要表現暢順，入彎要十分準確：「好多考生路試肥佬都係因為『轉彎位置不正確』同『無觀察交通情況』，作為師傅應該做出更熟練嘅技巧，入彎盡量唔需要回軚變得左搖右擺，觀察路面情況嘅時間要好準確，Cut線前一刻先好望。」
香港駕駛學院查詢：26046123