特區第一家庭爆出疑似益親家風波，再揭被指出口術幫弟婦事件，有人擔心會唔會學似台灣阿扁家族咁圍威喂利益輸送，話口未完，煲呔噚日竟然好似阿扁上身，對傳媒大控訴！
煲呔放完假，噚日企出嚟見記者，矛頭直指傳媒，指針對佢同家人利益輸送嘅報道係無中生有，惡意中傷，就算冇根據都肆意攻擊，又反咬傳媒將慳電膽政策扭曲，對官員唔公道，煲呔講咁多嘢，簡而言之即係錯在傳媒，佢自己啱晒。
自覺冇錯唔代表做啱
煲呔大反擊有冇道理，八方相信自有公論，不過自覺冇錯，唔代表真係做得啱。06年台灣政客同傳媒紛紛踢爆阿扁一家人私相授受、利益輸送醜聞，扁嫂、仔女、親家、女婿同新抱一個不漏，總之就閂埋門一家親撈油水，當時阿扁備受連串弊案困擾，喺《阿扁總統電子報》中大反擊。
阿扁形容無中生有、影射誣衊佢家族係惡質嘅問政現象，又批評傳媒濫用新聞自由，扭曲一啲政府措施原意，對官員極不公平。八方睇完阿扁嘅自辯，真係驚奇到O晒嘴，估唔到竟然同煲呔噚日言論似得咁交關，唔通禮賓府心戰室都睇過阿扁表白心迹之作，覺得係好嘢，叫煲呔有樣學樣？
阿扁上身呢一招有冇效，幫唔幫到煲呔甩身，唔使八方評論，全香港有目共睹，幾年前振振有詞辯白嘅阿扁，今日下場如何，更加係人所共知，煲呔誓神劈願話冇益親家，冇幫弟婦，所言非虛嘅話，當然唔使擔心步阿扁後塵，之但係其他人未必咁諗，港大民意研究計劃總監鍾庭耀噚日出席一個研討會時指出，領導人在位太耐，容易惹起民怨，因為民心思變。
煲呔唔通仲危過老董
鍾庭耀指美國總統四年一任，連任一屆都係做八年，反觀《基本法》規定特首五年一任，連任即係做足10年，面對民怨時壓力都大好多。鍾庭耀咁講唔係毫無道理，因為老董做八年就下台，煲呔做埋呢任都係做七年特首，唔通仲危過老董？
mailto:[email protected]