近排個個讚FIFA！但我依然不離不棄，更懷念班Friend嚟我屋企Hea講得最多嗰句：「開鋪Winning玩啦！」嚟到最新一集真實感大增，AI鬼咁醒、球星大頭近鏡連雀斑都睇到，我終於覺得無撐錯，咪就好似睇見南華殺入亞協四強咁囉！
文：阿洛
場場硬仗 無假波
先講畫面，係有明顯嘅進步，動作超過300種，連球證、旁證嘅反應都更加真實，最勁都係近鏡特寫時，終於似番個真人，費托凸出嘅顴骨、臉上嘅雀斑都落齊，而美斯又真係成個張家輝咁樣喎，真係靚得交關！
而球隊嘅風格同戰術都同樣更接近現實，好似巴塞會瘋狂進攻，利物浦就踢得保守少少，對電腦玩MasterLeague唔會咁易悶！而管理球隊時亦要兼顧簽球員搵Sponsor等問題，耐玩性大增。
直線盤球 難屈速
好多波友話FIFA真實性強，Winning就以爽快感見稱，今集Winning就喺當中取得平衡，直線盤球無咁易屈到速，扭波就要睇球員本身能力強弱而有明顯分別，而控球定唔定，亦要睇球員面向嘅方向同跑動嘅速度，整體上進攻入波嘅難度係增加咗，但系列傳統嘅爽快感都得以保留，令我有番晚晚開波嘅衝動！
主場威力 唔吹即噓
夠薑亂咁吹南華越位？掉你水樽吖嗱！主場威力大家上星期先喺香港大球場見識過，你有無好似羅班主咁感動到喊？
今集Winning喺球場、球迷方面都有落功夫，試玩版中球迷唔只喺入球時有主、客場之分別，客隊控球耐啲主場球迷都會噓，有越位嫌疑球證唔吹又噓，主隊搶截成功又會有掌聲，加埋旁述真係好似睇緊足球台現場直播一樣，嗱嗱聲開番場巴塞對皇馬止吓西甲癮啦！
Profile
遊戲：《WorldSoccerWinningEleven2010》
機種：PS3、Xbox360
製作廠商：Konami
類型：運動
人數：1-4人
推出日期：11月5日
