金管局發出指引，二千萬元以上豪宅，只准按揭六成。一般打工仔其實好難買入二千萬元嘅住宅，高級行政人員如果早年以三四百萬元買屋，間屋現已升至過千萬，於是賣屋，換入二千萬元豪宅，甚有可能，若非如此，點供呀，年薪四百萬嘅局長，拿四成稅後人工嚟供樓，供二十年，約莫可以供得起一千六百萬，即係賬面值二千七百萬嘅豪宅，香港有幾多人有年薪四百萬呢？
幾千萬，上億元嘅豪宅，買家多數係大把現金嘅人士。左丁山曾與一班賓架吃午飯，問佢哋如何睇供大大豪宅嘅按揭風險，點知幾位都話，呢類買家通常唔向銀行貸款嘅，自有辦法，佢哋如果要計供款與薪水比例，亦根本冇得計，必須考慮其他因素，故此金管局之六成按揭指引，並無實質意義。
然則陳德霖醒目過人，點解要與和廣北、王冬勝、梁高美懿、洪丕正、李民橋會面後，發出豪宅按揭指引呢？地產C話，此則表示陳德霖的確夠警覺，係一種政治動作，表示先知先覺而已，唔通議員罵任志剛對雷曼事件後知後覺嘅教訓唔夠深刻乎？另一方面，金管局要配合政府出口術，例如曾財爺約見地產商，房委會委員/行政會議成員/消委會主席張炳良教授見記者，講及重建居屋。重建居屋之事，房委會未有統一意見而張炳良率先公開談及，顯然係一個暗示：嗱，地產商請注意，唔自律嘅話，政府可能有動作o架！
出口術會唔會產生作用呢？地產商當然會畀面，暫時收斂吓嘅。但大陸買家唔識聽廣東話，聽唔見，繼續搬錢嚟掃貨嘅話，套用李四叔一句：「你吹脹佢咩？」
三億幾銀買干德道之五千餘呎「六十八樓」，究竟值唔值，根本冇得計。蘇格蘭St.Andrews高爾夫球場第十八洞旁邊有一座十九世紀名廈，六層高，形象高雅，二○○四年以三千二百七十萬美元（二億五千五百五十萬港元）售出，金融海嘯之後，蘇皇銀行收回成為銀主盤，最近標售，據講收到九份投標書，由一億二千八百七十萬元起，一般相信可能以一億九千五百萬元售出，嘩，對大陸客嚟講，抵到爛，唔駛兩億港銀，就可買到蘇格蘭古典名宅共四萬五千呎噃，呎價四千三啫，點解要買干德道咁笨呀？