中共建政60年餘興未了，噚日有兩個相關活動，新鴻基地產（016）郭氏兄弟以至甚少露面嘅郭老太都鼎力支持，不過老大同老二係分開唔同場合出現。
由中新社主辦嘅「新中國60年閱兵圖片展」，噚日朝早喺沙田新城市廣場開幕，作為贊助商嘅新地主席鄺肖卿同副主席郭炳江都有出席。郭炳江致辭時仲話，今年「十．一」佢有幸出席喺北京天安門舉行嘅典禮，一睹閱兵盛況，實在振奮人心。
大佬講國語 嘉賓變家崩
到咗下午茶時間，就到大佬郭炳湘單刀赴會，出席《新中國六十年》大型紀念畫冊首發儀式。郭炳湘雖然愛國，不過普通話就真係非常「普通」，「嘉賓」變咗「家崩」，自己都忍唔住話介紹完「家崩」就轉番廣東話台。郭炳湘「退下來」做非執董後，仍然係傳媒焦點，雖然唔再兼顧新地日常事務，但遇上地產熱話，傳媒仍會爭相採訪佢，搞到幾乎逼爆會場。