本月16日履新嘅港交所（388）候任行政總裁李小加，噚日首次見記者，佢好客氣咁話，本來上星期一應該同傳媒見面，但剛外訪美國回港，大把會議排隊要開，要拖延一周相當抱歉咁話。
由投資銀行摩根大通轉戰半官方監管機構，小加話工作咗一個星期，一切都好順利，對各方面業務嘅了解亦逐步加深。佢仲派定心丸話，得到現任總裁周文耀同其他管理團隊嘅幫助，相信交接工作可以有秩序進行。
之不過，小加不斷強調，正式坐正之前呢幾個月，唔會接受太多訪問，期內有乜事請聯絡周總裁，自己到位先至會就港交所未來發展戰略向外界進一步溝通。做過英文《中國日報》記者嘅小加話1月後到時再坐埋一齊傾，可能更有意思，又祝大家成功，收工前有更多古仔可寫咁話。