死過翻生一次都嫌多，兩次逃出鬼門關嘅滋味又如何？人稱「二郎神」、現駐守西九龍總區警署警長嘅楊志輝（楊咩）93年喺尖沙嘴大通銀行槍戰中中彈受重傷，喺深切治療部昏迷幾日，醫生話佢大命，點知後來細菌感染肺炎，情況一度轉差，可能真係命不該絕，又死唔去，楊咩接受最新一期《警聲》訪問時話：「生活始終要過，我夠硬淨！」
硬漢喺ICU瞓咗四星期，留醫三個月先出院，更獲英女皇頒發英勇勳章表揚，代價卻係後遺症纏身，楊咩話雖然受傷事隔16年，但家陣仍然會勁頭痛，手腳又會突然抽筋，唔能夠正常郁動，由於右邊面失去知覺，所以有時會不自禁流口水，好尷尬。