地產界議員石禮謙在位多年甘於平淡，一黐上煲呔親戚就街知巷聞，雷曼苦主見佢輕易幫煲呔弟婦攞到賠償，噚日去到政府總部等佢，要求佢一視同仁施以援手。
後日約見銀行
石禮謙初時只派助手到場，助手發現止唔到咳，惟有急call老細，石禮謙終於現身，苦主見到佢表現激動，拍晒手歡呼，當正佢係人民英雄，八方相信石禮謙都估唔到自己咁受歡迎。半推半就俾人拉上轎，石禮謙承諾會盡力協助，後日約見星展、花旗同渣打銀行嘅苦主代表。
若非有人爆料煲呔弟婦都係靠石禮謙揮贏銀行，相信石禮謙仍然樂得留在幕後，八方問佢係咪因為近日多見報先至企出嚟幫其他苦主，佢義正詞嚴咁話相信每一位立法會議員見到有市民求助都會幫手。雷曼苦主大聯盟副主席簡浩明大讚石禮謙係好議員，因為之前搵過好多議員都托手踭，聯盟下周四會喺立法會外靜坐30小時，唔排除絕埋食以示不滿。