謝霆鋒和太太張栢芝已有兩歲寶貝仔謝振軒（Lucas），本報今年7月已率先踢爆栢芝再度懷孕。霆鋒昨日難掩興奮，向傳媒露口風指栢芝近日身體起變化，暗示她已懷有虎B。
英皇旗下藝人謝霆鋒、容祖兒、鍾欣桐、蔡卓妍（阿Sa）和古巨基等，昨早總動員在楊受成淺水灣大宅舉行歡迎內地歌手孫楠加盟3年，順道拍藝人晒冷大合照。霆鋒言語間暗示太太張栢芝再度懷孕。
「肯定咗會同大家講」
本報今年7月踢爆栢芝突然縮沙拒做台灣好友范瑋琪8月在港的演唱會，有指她當時已有身孕，怕動胎氣才甩底，連月來更深居簡出。其實栢芝一直喜歡孩子，而Lucas已兩歲，栢芝也是時候替他添個弟妹。
霆鋒昨日改口風不再否認太太有孕，他說：「佢啱啱身體開始有變化，但冇刻意走去check，未經確認，肯定咗會同大家講。」霆鋒直認恨再做爹哋，但否認栢芝懷孖胎，他說：「阿爸咁多兄弟姊妹，但冇出現（孖胎）。」若栢芝生孖胎後，是否可收工？霆鋒說：「佢話要生5個，我話唔好啦，一個都跟到你哋（記者）咁。」問到栢芝可是不再接戲？霆鋒說：「畀佢做媽咪。」
眾星昨日盛裝撐場，惟獨霆鋒以踢拖healook姍姍來遲，埋位時即醒目企頭排中間位置，不過被現場指揮的高層霍汶希（Mani）叫他站側一點的位置，霆鋒待傳媒拍完即想速閃，Mani再把他拉回，Mani勸喻泳兒站好些，霆鋒即寸她說：「Mani，我今日鬚根會唔會多咗啲？」
有傳霆鋒即將自組公司，難怪他昨日未有盛裝撐場，他說：「我啱啱落機，已盡量執，執極都咁樣衰。」他表示跟英皇還有兩年合約。
祖兒爆基仔講鹹gag
此外，祖兒大爆與基仔在美國工作時大講鹹濕gag，基仔尷尬說：「我發誓冇講過，我諗佢（容祖兒）坐完長途機，咬字不清。」
採訪：馬建華 攝影：陳志嵐
