大市唔就，個別板塊卻出現禾雀亂飛奇觀，一如所料，資金偷步炒內地創業板相關股份，醫藥、節能減排、鋰電池、太陽能、家電下鄉、網上電視通通爆升。冇法子，近排無論大市定係個別概念股，手「花」盡入強者手，所以無論挾上定挾落都是易如反掌，升市成交唔配合，跌市當然亦冇恐慌沽貨。
見好識收的最佳例子係唯冠國際（334），呢頭公佈進軍太陽能及LED領域，股價單日勁升三成，點知翌日出業績見真章，全年蝕成29億元，股價打回原形，頓時一地大閘蟹腳毛。
炒消息股最忌跟風唔夠眼明手快，經典之一國際資源（1051），股價喺6月見頂時，由兩蚊跌落1.5元，呢個就係最後通牒，仲揸住而蝕錢嘅投資者唔好話走唔切，只係唔肯止蝕。
早前同大家分析過真明麗（1868），有耐性坐貨嘅朋友應相當滿意。同場加映開始有其他「菠蘿雞」出現，借LED燈熱潮博大霧。
炒消息股要眼明手快
市場突然搵番舊聞當新聞炒，做開電路板嘅達進精電（515），早喺9月已宣佈注資5000萬元人民幣（下同），同深圳東方光電合組搞LED路燈生意，仲話首年純利應不少於3000萬元，以佢佔股70%計，兩年多就連本帶利攞番晒。
根據內地半導體照明工程研發及產業聯盟資料，路燈喺政策推動下，預計由今年換140萬個，逐漸增加至2011年500萬個，即係話要換晒4800萬個要用上10年時間，生意長做長有。
市場大，越來越多人進入，粥多僧又多本應係好事，但喺千多家LED生產商入面，雖然年產量過億元的超過50家，但大部份只幫外國品牌做代工，中國名牌真係冇乜，反映行業分散之餘競爭亦唔細。人比人比死人，股比股知長短，區區幾千萬投資買得乜大家心中有數，投唔投到政府工程未知，即使投到又會唔會問股東攞錢？
想追逐呢張音樂椅嘅投資者，切記要留意。
胡孟青