在中環碰到教授W，揸住本馬經行街，乜咁得閒嘅，唔使教書咩？與教授W打個招呼，傾吓馬先。後來大膽啲問：「你今年開邊科呀？唔使教書咩？」教授W話：「我近年好少教書，主要係在實驗室做新產品應用研究，希望將理論變成實物！可以畀廠商生產。」都幾好吖，以前上市公司精電嘅創始人張教授、廖教授本來都係在中文大學電子工程系教書嘅，係高錕校長在中大教書時期嘅同年同事，後來佢地二人走出象牙塔，創立精電，推出第一代「投注寶」，上市後成為億萬富豪，後來成間公司沽售，退休印印腳咯。
教授W話香港冇乜科研好做，佢用好多時間在深圳與珠三角，因為內地對於花錢在科研上面，大膽得多，據講以GDP比例計，深圳用於科研嘅公共支出，係香港嘅十倍，唔怪得本地大學科研工作紛紛尋求北上機會，在珠三角爭取研究經費。當然，香港科技學者係有料到嘅，否則內地點會給予本地大學好多誘因，希望吸引本地大學北上設立科研基地吖。
教授W鍾意有時間就去馬場，視投注賽馬為另類腦筋遊戲，不同一啲自鳴清高人士，視馬場為鼓吹賭風嘅地方。講科技左丁山就自認敝鄉，講賽馬，自然與教授W談得有紋有路，十分投契。不過賽馬呢樣嘢，點都要講運氣，例如隻「雅雪」，成為大熱門，臨場票如雨下，點知隻馬竟然出現心律不正常，輸死人，當日有位老友見到一位練馬師揸住成大叠金牛落注「雅雪」與「鎗臣」單Q，想唔到「鎗臣」跑第一，「雅雪」跑第十四，該練馬師為之眼光光。
與教授W拜拜，見到已脫離大學，在中環做顧問嘅博士L；博士L又係馬迷之一，雖然唔係馬場常客，但對賽馬興趣甚濃，賽馬可能係凝聚不同階層嘅最佳工具，由目不識丁至殿堂教授，由富豪巨賈至販夫走卒，皆可用賽馬為共通語言，有人話足球先至係凝聚力冠軍，睇吓南華躉坐滿球場就知。上星期三晚又確係近年罕見嘅景象，好耐都未見過夜馬與大球場球賽同時出現，波迷馬迷同樣高興咯，有多啲呢類盛事舉行，邊個會講慳電膽吖。