大市勢如破竹連升3周，23000點似乎只爭朝夕。早前提過，本周內地有28家公司於周五在創業板上市，暫時已公佈申購結果的10家，凍結資金超過6600億元人民幣（下同），即平均每家凍結660億元計，呢28家公司閒閒哋抽走市場2萬億元資金，認真唔嘢小。
中證監講到明唔想見到首日掛牌有違規炒作，叫基金經理盡量唔好入市搞住晒，但斷估市場唔會咁聽話，仲一早已炒定影子效應，將資金投放於一眾創投基金，過去一個月創投類股份（如雲南白藥、首鋼等）走勢同上證綜指同步，但升幅輸蝕些少，似乎要等創業板正式運作始見真章。
已通過中證監審批嘅188家公司中，超過7成屬IT、新能源、生物醫藥等行業，當中市盈率最高要數寶德股份，超過81倍，名列全中國最貴股份之列，主營石油鑽採設備電控系統。
3板塊炒定影子股
至於紅日藥業就股價最大，成60元一股，賣點係做腦血管痙攣藥，聽落夠冷門，但正正係創業板公司特色，越獨家越受市場歡迎。可以合理推測，若然創業板首日唔畀炒家「玩得太大」，資金好有可能轉炒持有佢哋嘅創投類股份，繼而推高相關板塊股價。
既然大家已知創業板主題係醫藥、石油設備同新能源，就應該金睛火眼睇實香江相關股份會否聞雞起舞。
呢3個板塊較近磅嘅不外乎近期強勢股，做海上供油嘅光滙石油（933）、做LED燈嘅真明麗（1868）同蠢蠢欲動收緊貨嘅中國製藥（1093）；要玩有消息配合嘅有比亞迪電子（285）、剛公佈中期勁蝕29億港銀，一個屈尾十乘機放風轉型搞太陽能電池嘅唯冠國際（334），同買入中石油阿媽都有份嘅油田森源鈦礦（353），配合埋中石油（857）、中石化（386）業績期，相信整個板塊將非常熱鬧。
仲有唔好冷落幾隻中資銀行股業績，因為建設銀行（939）打頭陣公佈第三季度盈利，同比與環比增長皆優於預期，股價當然係領先指標，好友亦早已坐晒Call輪等開餐。
胡孟青