PS3搭眼仔遊戲，好似有《Winning09》加入3D自畫像、卡Game《EyeOfJudgement》等，可惜玩家始終小眾；今日搵嚟李卓庭（Eunix）大談寵物經，親身試玩MotionSense遊戲《EyePet》，又、又餵，仲教佢繪畫，咁咪好惡玩？但佢話綽綽有餘喎！
記者：陳國輝
攝影：譚盈傑
畫汽車變3D實物
以往好少體感遊戲出現喺PS3平台，今次出《EyePet》係咪代表佢轉型，不得而知；但更值得一提係呢隻Game玩盡「擴真實景」3D互動功能，簡單啲講，此技術嘅原理係透過網絡攝影機，將紙上嘅圖案記錄喺電腦，然後轉化成3D圖像；唔單止咁，此3D圖像仲可以同遊戲內嘅物件產生互動，而且有物理效果㖭！
聽落懶深奧，實情好簡單，玩落仲非常過癮！Eunix試玩當日，即教小寵物繪畫汽車。過程係佢先以白紙畫一架車，然後等Cam仔對焦及掃描一次，再記錄到電腦；過幾秒後，電視機上嘅小寵物就會拎起支筆照住畫，最抵死嘅係，呢架車會由平面變成一個3D物件，跟住Eunix就要用手掣遙控架車，陪小寵物玩捉人仔！除咗畫車，連飛機、坦克都冇問題，唔講仲以為自己係美術老師呀！
魔術卡陪寵物玩
無論你平日打開《街霸IV》大掣抑或普通震掣，總之玩《EyePet》基本上無用武之地！剛才提到，「擴真實景」具備3D互動功能，所以遊戲開始之前，你必須先讓PS3識別遊戲操作工具，而呢一樣嘢，亦即係包裝盒內附送嘅卡紙喇！佢用途非常廣泛，識別過之後，喺唔同遊戲場合，佢就會變成唔同嘅「工具」。例如小寵物肚餓，呢張魔術卡會化身成一個器皿，只要不斷用嚟裝滿食物，就可以餵飽佢；冲凉嗰時，魔術卡又會變成一個花灑，你要揸住佢一直向寵物身上淋水，然後仲要搽番梘，再用風筒吹乾啲毛，係咪好認真先！
Profile
平台：PS3
類型：益智
語言：英文
推出日期：11月2日
