樂隊Mr.噚日山長水遠去到屯門舉行簽唱會，吸引幾百歌迷捧場圍觀，同公司嘅麥家瑜就特別嚟捧場，o靚模A.Lin都有出現，佢話要跟Mr.學彈結他喎。
準備紅館開騷
不過A.Lin着住短裙，一坐低就唔小心露裙底春光，但佢顧住彈結他根本冇發現，至於Mr.講笑話怕記者見到佢哋望靚女，所以特登戴黑超，睇怕佢哋都睇唔到A.Lin走光失儀嘅一面。
A.Lin同公司嘅另一o靚模Evelyn同Mr.鼓手Tom拍拖，問A.Lin會唔會因為咁樣而同Tom保持距離？佢堅決咁話：「唔會，都係做嘢，同埋我估佢哋只係好朋友。」
Mr.嘅新碟成績理想，唱片公司打算安排佢哋食住個勢喺紅館舉行演唱會，佢哋話：「我哋啱啱收到公司通知，應該係一場，但好多嘢仲傾緊未知，但聽到個消息好興奮。」Mr.同歌迷玩遊戲，答中問題可以同成員擁抱，唔知係咪開心得滯，Tom竟然將男歌迷抱起，好鬼搞笑。