繼成功爭取企鵝移民北極後，民建聯又話成功爭取設立香港國家級地質公園，噚日仲帶班記者去萬宜水庫邀功。區議員楊祥利話，民建聯早喺05年已推動設立地質公園，如今努力終見成果，深感欣慰。
楊祥利呢番言論，都可以話係繼青年民建聯主席張國鈞嘅「北極人少企鵝多」言論之後，又一混淆視聽之作。八方問過香港地貌岩石保育協會主席吳振揚，香港設立地質公園嘅計劃書，係由協會聯同內地三位地質學家率先發表嘅。民建聯嘅角色，只不過係支持計劃，同埋喺立法會動議要求政府做嘢。
吳振揚話，民建聯喺整個香港地質公園嘅設立過程中，只扮演一個好小嘅角色。由草擬計劃書、邀請專家來港辨證鑑定，到上京陳述香港情況，民建聯都冇份。民建聯家抽水領功，吳振揚話係不負責任嘅言論。
民記屎橋早被放棄
楊祥利仲話，民建聯嘅地質革命尚未完成，佢哋仲想將馬鞍山礦洞列入埋國家級地質公園一部份。有官員同八方講，若然政府當初接納呢條屎橋，就肯定冇今日嘅香港國家級地質公園。事關馬鞍山礦洞根本係普通料，全國有數以千計同類礦洞，而且岩洞地勢危險，管理困難。
呢位官員仲話，當初政府死都唔肯接納民建聯嘅地質公園建議，係因為個計劃書包埋起酒店餐廳，完全唔係地質公園應有嘅保育概念。民建聯確係抵鬧，噚日當住記者面前，叫個湖北教授隨手執嚿石返內地化驗，一啲保育意識都冇。