前一輪股海氣氛麻麻，搞到上市新股未掛牌，暗盤價已先行破底，首日上市情況一樣冇得救。唔少人當初睇好的中冶（1618），仍然「潛水」。另外華潤水泥（1313）掛住「華潤」嘅招牌，好多市場人士讚不絕口，但認購者持貨至今一樣要「坐艇」。
仲有隻華南城（1668）現價僅得1.46元，較招股價2.10元低30%，有散戶替其改個諧音花名叫「嘩難升」，就知呢隻股幾咁「深入民心」！
近期股海再創今年新高，半新股表現榮辱互見，上面幾隻唔知點搞，但企穩招股價樓上的半新股則嚟料。好似國藥（1099）升破20元後，走勢轉強，上周五再升近9%，收報27.40元，可謂強勢畢露，有貨在手不妨睇吓30元能否攻破，若破關失敗，伺機食糊。
國藥當初上市估值不低，家陣股價又升咗咁多，市盈率高達67倍，若能在30元附近沽出，賬面利潤逾80%，都算唔錯啦。
方星俠