豪宅玩層數，隨便中意跳幾多層就幾多層，這種「跳樓」遊戲，考起消防和警隊。大吉利是，有銀一族在豪宅高層「忽然曾俊華」，極須通波仔急救，打三個九講到論論盡盡，到時未必有咁好彩救得切。這不是醫療失誤，鬼叫自己迷信，任地產商綑綁在「跳樓機」上。平時眉精眼企，買樓竟然鬼掩眼，也是命數如此。而萬一豪宅有人企跳，講到明是在88樓，試問邊有消防墊能救，只能由他。但現場證實，企跳位置明叫88樓實則是14樓，誤導至此，實死無生，神仙難救。圍觀的街坊乘機教仔，二加二永遠是四，顯淺道理，無謂混淆視聽。
地產商推搪，是買家唔妥十三，不祥啊，不祥還要加一（但不可以收10%），十四啊，用家點肯收貨。這樣下來，社會上總有這樣那樣嫌三嫌四的聲音，到時侯，十三歲的少年，滿腦袋種生基的父母會自動替他升呢，從十三跳去十八。人到得二十四橋明月夜之時，擅自四改八過關。嫌七唔好聽，食七就算。靚女年年二十八，易發難收，年齡玩轉幸運輪，是潮流高尚玩意，不屬欺詐。將來第N屆特首肯定不是梁振英，而係家住2388樓全家包括寵物狗都是188歲的人妖！三八，好快會被地產商據為己有，闊佬節，婦女借歪！