話劇團行政總監K來電，介紹左丁山及朋友去睇十一月十四日及十一月十五日兩日公演嘅話劇，名叫《珍重星光》。據總監K講，呢套話劇為紀念新亞書院創辦六十年而創作，由劇壇經驗豐富嘅老手張秉權博士做劇本統籌，搵齊新亞書院三位不同年代畢業嘅編劇高手撰寫，分別係七十年代之方競生，八十年代之黃婉芬，千禧年代之鄧惠儀執筆。寫劇本之前，籌辦人員安排劇組人員分別與新亞老人家唐端正、孫國棟、黃祖植、列航飛、宋敍五、高美慶、盧瑋鑾（小思）、劉國強、周錫輝等人會談，又向中生代蔡子強、馬嶽等人討教，參考有關文獻書籍，前後花了七個月時間，先至落實劇本結構，再由張秉權為主題定調，做好佈局，於是最後產品「悠悠六十載，戀戀新亞情」一共三組故事就連結一起，呈現觀眾眼前。
演員都辛苦o架，自九月下旬開始，已借用昔日農圃道新亞書院（今新亞中學）嘅「誠明」禮堂排演，老中青三代校友全力參與，包括魏綺珊、張宏艷、謝健民、尹偉程、張文瀚、鍾肇熙、羅穎妍等等，導演由陳焯威擔任。
總監K從事文娛、劇團工作已近三十年，監製話劇嘅經驗十分豐富，佢話《珍重星光》雖然係一齣關於新亞創辦，興起前後六十年之故事，最適合新亞校友、師生嘅情感與口味，但新亞經六十年演變，畢業生眾多，對香港社會發揮了影響力，在各行各業貢獻不少，例如余英時、小思、陸離、辛世文、張洪年、李天命、岑逸飛、鄭海泉、徐立之、李明逵、陳茂波、張文光及眾多教授、校長、老師及傳媒編輯記者等等已成香港本地文化一部份，相信社會人士亦會有興趣一看。買票方面，在城市電腦售票處發售，全日制學生、六十歲以上長者及殘疾人士有半價優惠，亦可打電話31035900（陳先生）或26097609（文先生）查詢節目，票價分三百、二百、一百三款，在香港大會堂上演。
聽總監K講完，說來慚愧，自己讀書之時，一唔識唱歌，二唔識演話劇，三唔識玩樂器，只識寫稿，搞學生會，甚無趣味。呢日聽到另一位新亞人馮強（浸大財經新聞碩士課程主任）講，佢在新亞之時，憑彈結他、唱民歌，攞幾次系際演唱冠軍，最近又會夾band表演，歡迎參加喎。