前晚英超冇咩大戰,我求大俠順理成章睇伯明翰對新特蘭,叫做支持吓港人班主楊家誠,結果伯明翰由列治維同麥法頓各建一功,就算比賽後段有後衞史葛丹恩擺烏龍,仍以2:1勝出,楊生首次喺主場領軍就贏波,攝影機仲影到佢喺完場一刻同成班球會高層擁抱慶祝㖭,今次威啦!
小明哥撐場九唔搭八
成班麻甩佬擁抱,原本冇咩特別,不過當中就有一個既熟識又唔應該喺場入面嘅人物,就係人稱小明哥嘅徐小明喇;原來楊生有意邀請佢為伯明翰拓展大中華市場,今次亦係小明哥第一次入場睇英超,賽後佢仲話:「其實開波前落雨,開波時唔單止停咗雨,比賽嗰時仲出現彩虹,果真係紫氣東來,畫出彩虹。」
小明哥你咁識做,楊生唔請你都唔得啦,不過我求大俠睇過小明哥最近嘅電影大作《奪標》,感覺就認真out喇,希望小明哥先了解一吓現時年輕球迷嘅喜好先啦。
由楊生帶領下,伯明翰一片歌舞昇平,賽後連領隊麥利殊都要擦吓老闆鞋:「今次勝利對球員、球會以及全個伯明翰市都好重要。我好開心同新班主合作,楊生同余懷英(球會副主席)都對足球充滿熱誠。」
伯明翰仲想越搞越大咁,好似想搵前利物浦領隊侯利亞出任顧問,侯利亞兩年前因為身體問題辭任里昂教練,如果伯明翰份工冇咩壓力,都做得過。
斟侯利亞范志毅搞大佢
又有傳伯明翰想搵前國足隊長范志毅出任教練,范大將軍家帶緊上海U16踢緊全運會,范將軍就回應:「我收到邀請,但我尚未決定。」
如果搵得成呢兩位仁兄,加埋麥馬拿文、卡林保等名宿,伯明翰高層都叫星光熠熠噃;雖然家吓有大把人前呼後擁,不過我求大俠就奉勸楊生唔好咁快開心住,事關下輪聯賽就要主場對曼城,呢隊由油王撐腰嘅富豪球隊,一啲都唔少嘢o架!