劉德華早前被本報踢爆同拍拖24年嘅朱麗倩結咗婚之後，當時俾各界狂鬧佢講大話，最終華仔公開承認婚訊，獲得唔少死硬派fans支持。
呻情緒低落
一向識冧fans嘅華仔自從喺上月同香港歌迷舉行生日派對之後，噚日佢專程飛到台灣出席當地歌迷為佢補辦嘅生日party，不過呢次行程好低調，除咗唔接受傳媒採訪外，佢只會逗留喺台灣8個鐘。
由於今次係華仔認婚訊後第一次到台灣，所以吸引咗當地唔少傳媒追訪，仲有過百歌迷接機，華仔喺現場對fans亦有求必應，表現親民。不過面對現場記者問及有關生育問題時，佢就顯得好避忌咁話：「這是我的私事，是我跟喜歡我的人的事，對不起，我以後也不會再說明。」
華仔去到台灣後就趕到會場同近千歌迷聚會，華仔除咗任抱任攬外，又應fans要求做出心心動作同屈膝扮孭起fans。派對當中有小朋友影迷上台，華仔即刻父愛發作，踎低同小fans合影。
據現場fans話，華仔喺聚會開始時表情有啲僵硬，仲向fans吐苦水：「我來台灣，記者一直追着我不放，讓我情緒很down。」派對傍晚6點結束，華仔搭車趕去機場搭機返港，但依然俾大批記者同fans包圍，但佢都不忘提醒fans小心：「不要跟媒體擠，他們要拍照。」之後就入閘離去。