退休入境處處長黎棟國翻閹做保安局副局長，個個月有長俸兼攞逾21萬人工，真係好世界。係人都知佢係下任局長大熱，噚日佢接受商業電台訪問，主持人叫佢局長得唔得，黎棟國一時口快快升呢，「第日等我上咗位先啦。」
黎棟國知道講多咗，隨即自兜，「即係我（11月）上任後，我個職位係副局長，你稱呼我副局長啦。」又話叫佢英文名簡稱TK最好，如果李少光放假或公幹，佢都有機會做署理局長。黎棟國退休幾個月，附庸風雅學書法，不過佢話自己天資有限，冇乜成績。好彩仲可以弄孫為樂，佢透露孫女早產個幾兩個月，慶幸家陣快高長大，雖然已經10幾個月大，可惜仲未識叫爺爺。