八方細細個就聽長輩教落，做人唔好因小失大，贏粒糖，輸間廠，何必呢？做大事嘅人尤其唔可以計錯數，政府都叫人唔好為贏咗場交，輸咗個家，偏偏煲呔今年施政報告卻唔派糖，反而派監人乃後燈膽券，好嘞，家陣卒之自食其果，家唔止輸間廠，輸凸民望㖭！
河蟹到不得了
煲呔放假期間做署理特首嘅唐英年，平日蓮子蓉口面，明顯深明係人都鍾意攞着數呢個道理，噚日去荃灣出席「荃城嘩鬼藝術日」活動時，就幫施政報告補鑊，周街派糖，來者不拒，真係皆大歡喜。雖則身為署理特首，不過唐唐未夠膽真金白銀派錢益街坊，只係現場有個即製棉花糖攤位，好多細路排隊想食糖，唐唐就趁機將棉花糖派畀佢哋。
派糖係政客攞分指定動作，因此過去幾年，香港嗰個「政治家」見到民望向下、民怨沸騰有唔妥迹象，就會打庫房主意向市民派糖，原來唐唐唔聲唔聲，已經曉得派糖爭取民心。八方現場所見，佢派糖有板有眼，絕對唔係亂咁派，伸手攞嘅派，冇伸手都派，細路仔派，大人都有份，因此氣氛河蟹到不得了，冇話鬧出派糖唔公道俾人鬧咁低能嘅事。
唐唐派糖齊歡暢，如果話背後冇人教路，真係講都唔好信，八方有理由相信唐家班心戰室進行過沙盤推演，覷準時機大手派糖，否則為何早不派、遲不派，等到煲呔避走香港先出嚟派？市民對今年施政報告評價之差創回歸後新高，好多人都覺得內容不切實際仲衰過老董，唐唐做署理特首露面派糖，真係巧合咁簡單？
睇清楚先拍掌
派吓糖就獲得市民前呼後擁，呢啲糖真係派得過啦，不過八方請大家睇清楚，唐唐派嘅只係輕飄飄，好似陣風咁嘅棉花糖，嗒唔得幾耐，一放入口就溶，更莫講話靠佢飽肚，因此見高官派糖真係要睇清楚先好拍手掌。口惠而實不至嘅政治花招好多人識做，燈膽券有辦你睇，表面上環保，實際上逼人換燈膽兼要加電費，呢啲糖衣毒藥，立亂放入口，真係分分鐘食粒糖，輸間廠o架！
mailto:[email protected]