Halloween殺到埋身，聽厭鬼王潘紹聰的恐怖熱線，被司徒法正頻頻「出事」嚇怕，不妨聽吓班索鬼妹分享靈異體驗。別看鬼模鬼聲鬼氣，原來一樣怕撞鬼：新紮Canon甜心JessicaC.回憶當年日本同房詭異暴走；Jocelyn夏威夷遇連環熄燈事件；AmandaS.法國遇吊頸女鬼嚇到標尿；仲有Rosemary左眼見到掃墓男㖭……聽鬼妹講鬼古，原來別有一番韻味。
撰文：葉雪
Jocelyn頑皮鬼玩燈掣
我係夏威夷出生長大，由細到大都聽過不少鬼故事，我都有幾次恐怖經歷，有一次因工作關係要去Maui島影相，仲要喺當地一間酒店過夜，嗰晚得我一個人瞓，臨瞓前睇吓書，睇睇吓，突然間房燈自己熄滅，之後又自動開返，重複咗好多次，跟住收音機又自己開着，嗰時只得我一個人，真係好驚！於是惟有用被冚過頭，一直念經念到天光，嗰次真係好恐怖！另外一次都係發生喺夏威夷，10年前左右我帶一班朋友去附近玩，影相留念，影完第二日曬相時，發現企喺我後面有一個鬼影，我嚇到即刻掉咗張相，之後都唔敢再去嗰邊玩。
JessicaC.同房撞鬼夢遊
我相信每個人都有自己嘅鬼故事，但未必係每個人都敢相信啦！我記得兩年前，我喺日本工作，一晚瞓覺，我感覺到我嘅同房突然起身，感覺好唔尋常，佢好似唔停咁行來行去，好似喺度等我起身咁，我嚇到全身打冷震，成晚都瞓唔着覺，但又要扮瞓緊。
細個嘅時候我哋一班細路都鍾意到處敲門問鄰居攞糖果，好開心！我好鍾意萬聖節，每個人都扮鬼扮馬、都會悉心打扮一番，好得意！今年萬聖節我要去內地工作，如果唔使工作，我都會去蘭桂坊瘋狂咁玩個痛快！
AmandaS.見吊頸鬼瀨尿
我係相信有鬼存在嘅，記得12歲嗰年，我同父母一齊去法國旅行，住喺一個城堡裏面，一走入去我已經覺得好唔舒服，唔想自己一個人瞓，就嘈住要同爹哋媽咪同房，佢哋惟有加張床喺房中間，間房好大、樓底又好高，我真係好驚，熄燈之後，我睇見一個着古典禮服嘅女人喺天花板上吊頸嘅影，起初仲以為係窗簾影，於是即刻起身拉好啲窗簾，熄燈之後再想瞓時，竟然又再次見到呢個吊頸嘅女人喺天花，嚇得我半死，最後仲瀨尿㖭！
Rosemary群鬼房內掃墓
喺7、8歲嗰年，我同祖父母住喺法國，有一次遇到不可思議嘅事件。有一晚我瞓醒咗，見到幾個着住古代禮服嘅男人，好似喺度掃墓咁，由房窗口行到門口，佢哋個個都面色蒼白，木無表情咁，我嘗試搣下自己大髀，想知道係咪發緊夢，又一邊拍醒身邊嘅嫲嫲，但嫲嫲話冇事，叫我瞓覺，自此我就相信世界上有靈體存在，所以身上會帶住十字架。
LisaS.廁所鬼擾睡眠
幾年前我喺台北工作，入住一間聞名有鬼嘅六星級酒店，同房仲有一個做production嘅工作人員，嗰日做完rehearsal自己返酒店先，瞓到凌晨發現好嘈，當時就覺得個room-mate好過份，半夜三更用廁所咁大聲，實在太離譜。到我第二日起身，佢又唔見人，去到工作地點見到佢咪想鬧佢點解咁過份，點知佢話噚晚做嘢做到天光，根本冇返過酒店房，所以之前一直都唔信有鬼，依家咪信囉。
AnaR.白光鬼影嚇醒
有一次去日本做嘢，同一個room-mate一齊瞓，我嗰陣時已經瞓着咗，無端端聽到我朋友尖叫，我朦朧間見到有白光鬼影，自己都希望係錯覺，嗰時都好驚，因為知道我哋住嘅酒店喺六本木，嗰度曾經打過仗。我自小已經好迷信，相信世間上有鬼魂，不過因為我嘅生日（10月29日）同Halloween只係相隔一日，所以對我嚟講呢兩日有雙重surprise，每年都會慶祝，仲會DIY戲服去派對。
