民建聯立法會議員張學明大埔首個議員辦事處噚日喺富善邨開張，林鄭、曾德成兩個局長捧場，鄉議局發叔都有現身，張學明講到明對呢個議辦寄以厚望，因為民記黨員之前幾次喺富善出選都輸俾白鴿黨關永業，希望藉此據點爭取機會服務街坊，遲啲會分別喺荃灣象山邨同屯門碼頭開多兩個議辦。
張學明大埔嘅議辦總幹事黃元生相信肩負打衝鋒嘅重任，之前兩屆區選，民記李愛群、溫官球先後做炮灰，八方祝黃元生好運。
不過關永業仲大鑊，事關呢次民記擺明玩鋪勁，因為陳克勤已在富善邨有議辦，連同張學明前後包抄，加上鄉議局同新界社團聯會左右夾攻，真正四面受敵，家陣應該震過貓王。