噚日港大舉行本科入學資訊日，校長徐立之戴口罩出場，佢話感染咗病毒，呢幾日喉嚨痛，作病，不過工作忙，唔得閒病。
徐校長捱到病
校長話每日要親手簽十幾廿封感謝信畀捐款大學嘅善長仁翁，加上改制「三三四」在即，學生大增，又要擔心獎學金、助學金唔夠分，第日又會出山任教，唔怪得徐校長捱到病兼額頭多咗皺紋。
資訊日全日有43,000人入場，較去年多成倍。港記遭新疆武警毆打，據講家長都唔鼓勵子女讀新聞系，英華女校中七生陳懷冰都話驚去大陸或者落後國家採訪會俾人打，所以要諗吓做唔做記者。曾經因採訪被黑幫下追殺令嘅新聞系總監陳婉瑩教授話，俾人打只係做記者嘅其中一個挑戰，怕打唔好入行好過。
陳教授仲勸學生，想搵錢應該做政府工，做記者要有犧牲兼肯捱心理準備，不過傳媒行業提供到嘅視野同發展機會比其他行業大好多，求學求職無必要太功利、太短視。