味丹國際（2317）左秤右秤，點都抵搞，買入等爆邊。味丹1年嚟升幅兩倍，睇落好似好厲害，同類主打味精業務嘅阜豐集團（546），1年升幅係12倍，味丹實情超級大落後。味丹NAV1.80元，現價0.78元折讓57%。同類股阜豐，冇折讓不特止，PB係講緊挨近3倍水位。味丹就算翻一番，PB仲喺1倍樓下，兼未有耐追到阜豐。
味丹08年度（12月底止），因為越南廠房環保事件，俾罰款及補繳水費合共773萬銀（美元．下同），純利跌到得番840萬銀，但呢壇嘢只屬一次性，09年度再唔受影響。保守計數，味丹全年純利上番2000萬銀，預期PE都係得6.8倍單位數。講PE，味丹亦係好抵買。味丹上星期五挨近1年高位，似想爆邊，呢轉係咁易博味丹翻半番到1.17港元，預期PE都係得10倍。
世城落後9條街
世紀城市（355）半年嚟大致打橫行，累積升幅得39%，同系富豪國際（078）同期升幅87%，百利保控股（617）更加達到1.2倍，世城跑輸同系9條街，博落後，博世城。
世城連酒店重估後嘅NAV1.66元，現價0.48元折讓高達71%，相對同系折讓，世城一啲唔輸蝕。嚟轉短打，博世城NAV折讓收窄到60%，價見0.66元，即係現價要升38%，潛在回報率都有魚有肉。
錢雋