社民連高層雞飛狗走，人稱「齋Sir」嘅浸大宗教及哲學系高級講師陳士齊，係社民連行政委員兼政策研究部召集人，係黨內「大腦」之一，日前亦突然退黨。
黨內人士指應該同近日籌款風波無關，可能係上月有社民連成員踩民建聯場後遺症；當日幾人拉橫額抗議夏韶聲唱好《大國崛起》，事後毓民嚴厲指摘踩場者，認為咁做太唔畀面夏韶聲，網上有人認為毓民不該針對自己人，要求毓民罪己，齋Sir同情踩場者，或因此憤而退黨。
知情人士透露齋Sir對黨最高層早有意見，踩場事件只係決裂導火線，社民連外務副主席陶君行指陳士齊積極黨務，五區總辭政治說帖亦係由佢執筆總其成，因此會盡全力挽留，只怕一走了便永遠再不回頭。