老牌咖啡供應商榮陽老闆黃冠樺，半年前引入俗稱貓屎咖啡嘅印尼蘇門答臘野生麝香貓咖啡豆，以「平民價」每杯180元殺入樓上咖啡店，比酒店平一半，買豆自磨自煮每杯約110元。黃Sir話，推出以嚟都有700個客飲過佢嘅貓屎咖啡，見咁多粉絲，決定成立麝香貓之友會，噚日首次舉行品啡大會。
介紹三款麝香貓咖啡
黃Sir一口氣show咗三款野生麝香貓咖啡豆，分別係峇里、蘇門答臘、東爪哇免費任試，即場傳授烘焙同煮製秘技。佢話家唔少咖啡迷自己炒咖啡豆。一部家用炒豆機大約1,600元，一次炒70克豆，可冲4杯，「啲豆炒得越深色味越濃，炒得唔夠色會酸。中炒味道最啱普羅大眾，即係用攝氏230度炒約5分鐘啲豆夠味。啲豆炒完至少擺放約8至12小時先好磨。」
磨豆煮貓屎咖啡也有竅門，唔好用紙漏方式煮貓屎，一定要用虹吸壺蒸煮。製法採用溫水煮咖啡，當下層熱水湧往上層裝有咖啡粉嘅玻璃壺，再回湧下層嗰陣，須用攪棒貼壺邊順時針打圈慢攪，就可吸晒咖啡粉嘅精華，「仲要齋飲先飲到貓屎甘香味道。」
小妹係咁飲，都係蘇門答臘最好，齒頰留香。只要之前買過或飲過佢啲貓屎咖啡，獲贈證書就自動成為會員，唔使入會費。上環SafetyStop樓上咖啡係其中一間賣佢哋貓屎咖啡嘅舖頭，查詢：25424268。
電郵：mailto:[email protected]
