董事H請客，在老牌酒家「喜萬年」食乳豬及「海斑天婦羅」，董事H話此乃喜萬年兩大名菜，不可錯過咁話。先來一個西洋菜陳腎湯，單尾係魚片花生粥，極為鮮甜，同枱客人紛紛向董事H攞菜單，並且要求價錢與董事H嘅相同。董事H笑言：「請食飯你地仲有咁多嘢講？」大家講笑啫，談話題目其實集中於慳電膽是否益親家。大家都唔信呢樣嘢，認為曾特首不至於此。但對於使用慳電膽呢回事，大家又一致認為邱騰華局長思慮不周，明顯缺乏辦事經驗，政治觸覺更加曳，倉卒向若干環保團體壓力低頭，叻唔切，反而連累埋特首。
用慳電膽之最終目標，無非為減少碳排放。世界氣候高峯會將於十二月在哥本哈根召開，奧巴馬已於十月廿一日致電北京搵胡錦濤傾氣候變化，摸下底先，以免在哥本哈根傾到面左左，預料到時中國一定有若干減排承諾，香港焉能不跟風吖，自以為醒目嘅高官咪做定啲嘢，以示先知先覺囉。哥本哈根峯會能否達成共識協議，好難講，起碼中國與印度會聯手代表發展中國家嘅利益，與發達國家抗衡，確保中印兩國嘅經濟發展不受排放限額所限制。
有好多辦法可以減低碳排放，用慳電膽係其中之一，以天然氣為發電主力，逐漸代替煤炭與石油，係其中之二，當然還有其他。想嚟香港特區想話推行慳電膽咁小事都搞到雞毛鴨血，要信佢有更好辦法推行，又係比較困難一啲。
話題之二就係樓價，共識就係豪宅價格創世界紀錄，未必係香港之福，況且呢啲「紀錄」涉及樓宇第四十五層變成六十八樓，上一層就係八十八樓㖭，屋宇署表示無例可管，只要樓層編號是有邏輯地順序編排，便會接受。哦，以後為了迎合顧客需要，最好最低層一樓就改為8樓，之後就係18，28，38，68，88，98，118，128，138，一路發落去，左丁山好想住在1338樓。董事H為之搖頭，認為此風不可長，始終豪宅天價與平民屋價相差太遠，凸顯貧富不均，社會怨氣不止，何來社會和諧呢。