《變形金剛之狂派再起》港版DVD，日前終於見街，若為收藏，不求終極靚聲靚畫，一定好啱，事關今次特別加入鐵盒裝、變形特別版以及電影珍藏套裝幾款，送Q版玩具兼靚包裝，雙碟版更內附3小時超長氣Bonus，煲完翻煲都無問題！
記者：陳國輝
攝影：林栢鈞
《狂派再起》靚位逐個睇
變形金剛晒你冷
如果你細路年代有睇過《變》卡通片，無理由唔追第二集！對Fans來講，今次最正係注入大量新角色，例如故事一開始，已經有5、6個博派同狂派嘅機械人發生混戰；嚟到尾段，仲有行動緩慢嘅超級巨無霸建造派登場㖭！講到跟原著有無出入，導演米高比爾早就話明，外形設計唔會照抄卡通角色；但係，另有網上Fans發表言論，佢話今集無端端多一隻會變人類嘅機械人，勁古怪，更懷疑係抄《未來戰士》咁話！無論啱唔啱聽，今集的確出現咗好多款變形金剛，小如家庭電器，大如飛機坦克，淨係視覺已經係一種享受！
睇25年卡通玩具
套戲Hit成咁，唔煲埋Bonus點對得住自己！孖碟DVD特別加插長達3小時嘅額外內容，基本嘢例如導演及監製專訪、刪剪及從未曝光片段、CG製作流程等亦有詳細講解。呢啲都未算勁，最吸引係收錄埋《變形金剛》由誕生至今25年來，曾出現過嘅動畫、電影片段，以及玩具精品，幾乎全部晒冷，身為《變》Fans又點可能錯過！
Profile
類型：DVD
畫面：2.35：1
聲效：DolbyDigital5.1
語言︰英語
字幕︰英文、泰文、韓文、國語、粵語、印尼文、馬來文
特別收錄︰導演及編劇講評、製作特輯、與米高比爾同遊東京的一天、變形金剛25年、資料庫、視覺特技解構、刪剪及延長片段等
試藍光：聽DTS-HD有進步
既然Blu-ray有得睇，當然要拎去測試吓聲音同畫質！影音專家Ricky話，同上集藍光相比，因為佢由DolbyHD改為DTS-HDMA，音效立體感強烈咗，低音表現更加有力！不過，一直未發現傳聞講到嘅iMax片段。佢話，《變》Blu-ray採用2.35：1格式，而非iMax嘅16：9，就算真係有iMax，亦好可能於稍後推出。
