由殺校邊緣到窮家子弟樂園，鮮魚行學校都幾傳奇。唔少有心人近嚟一直向學校泵水，就算金融海嘯殺到都捲唔走佢哋嘅熱情。校長梁紀昌噚日同八方講，話學校由今年4月到10月短短半年，居然逆市籌到超過270萬捐款，連佢都覺得係個奇蹟。
有錢喺手，學校嘅連串大計就可以推行，學校嘅低收入家庭學生今個學年起係「三免」：免書簿費、堂費同埋活動費，學生想學古箏定芭蕾舞都唔使科水，佢哋今年仲會推出個「大四喜」計劃，學生只要四科及格，就會獲得學校送出手錶一隻作為鼓勵，手錶係內地一個廠家免費送畀學校。得到咁多人關心，連八方都感受到嗰陣溫暖。