【上月盟主】世事認真難料，西甲水平同英超有得鬥，不過周中歐聯4支西甲兵只得1勝3負，兩支班霸巴塞隆拿同皇家馬德里更主場輸波，相反好耐冇喺歐洲盃賽揚威嘅法甲兵，就3隊全勝。
里昂防線成籮傷兵
小弟就成場睇足里昂作客利物浦嘅比賽，能夠作客反勝紅軍絕非意外；當然你可以講利物浦冇費托，謝拉特又中途傷出，但論整體控球及控制節奏能力，里昂絕對勝過紅軍；尤其當中鋒巴菲迪比高美斯下半場入替，打番里昂慣用又極具侵略性嘅4-3-3陣式，即刻攻入兩球反勝。
里昂周六就作客尼斯，牌面上就冇得打，尤其里昂歐聯3連勝，出線在望，點都可保住榜首位置；米高巴斯圖斯仍養傷，好彩高禾傷癒頂住個位，前線火力仍夠，不過後防就好多傷兵，安達臣基巴、保迪馬、保桑等中堅養傷，之前已經要杜蘭拿串演，巴西老將克里斯上仗又傷咗個頭，上陣成疑，尼斯雖然只列中下游，不過4場主場有3場入到波，入球「大」有2.1倍，比1.67倍客W更加值博。
鯨魚冇心機捧山葉
除咗歐聯，今周本地球壇焦點當然落在南華對競技嘅亞協盃準決賽度，賽後本地球迷都對南華出局好不滿，尤其同樣來自西亞嘅球證，有偏幫客軍之嫌。其實亞洲盃賽黑暗面又豈止呢場，亞冠盃4強首回合，沙地嘅伊蒂哈德主場對日本嘅名古屋鯨魚，來自阿聯酋嘅球證亦有偏幫之嫌，搞到鯨魚輸到2:6，周日返到日聯對磐田山葉，仲邊有心機，博客W啦。
文：牽牛
結餘$98,417
本金＄100,000（上周賺蝕：-$1,900）
近5場往績：LWLWD