個多月前，陳琪誕下女兒胡芷苓，坐月期間她將重責交給陪月，還有中醫師貼身照顧三餐進補。自喻為聽話的準媽咪，陳琪為免雙方父母插手干預導致意見太多，中醫陪月預先跟他們傾掂數，讓她坐得安心。
記者：林佩婷
攝影：周旭文
場地：BLTSteak（27303508）
十日唔冲凉
傳統話坐月不可以洗頭冲凉，牙都不能刷！陳琪都算聽話，上個月熱也不開冷氣，實在汗流如倒水，忍無可忍才開。坐月頭幾天只抹身不洗頭，最高峯一日抹十多次。直至第十日，終於高呼要洗澡。一聲令下，陪月即時準備一煲藥材製凉茶水，並將全屋水桶注滿熱水來溝凉茶。但準備就緒時陳琪又嫌臭。「聞陣味就覺得好臭，猶豫會唔會洗完仲臭，陪月安慰話乾咗唔臭。諗住冲完會好啲，點知個身仲滾。之後每星期冲一次，全家人都要幫手。」雖然陪月話最好持續多一段日子，但坐完月她就像放監一樣，每日冲夠四次凉。胡仔沒有勸止嗎？她輕輕笑說每次凉茶浴他都要幫手洗頭，現在不用了，大家同覺甩身。
一日三餐狂進補
飲食方面，她開刀兼餵母乳，中醫從生產前跟進，之後每兩星期把脈調整菜單。醫師說初期以調理脾胃及通乳上奶湯水為主，如淮山杞子大棗湯、通草木瓜眉豆豬手湯；中期滋陰養血，如阿膠黨參湯、四君湯；後期補氣血飲多點人參石斛湯。講到底，她說成世女都未試過一日食咁多，早餐仲要食肉！「晨早6點餵奶後食早飯，好似蒸肉餅、湯水同藥材茶；12點午餐一個人要食一碗飯、一大碟菜同肉，仲有一條魚同魚湯。晚餐又係三餸一湯自己食晒，但11點幾嗰盅補藥最難飲，我都有試過反抗，最後都要飲。話晒每盅成本幾百蚊，唔飲咪蝕。」
湊女當運動
其實坐月期間，都應該做適當運動。但陳琪相當討厭做運動，以開刀生仔為由完全唔郁。為免她抱BB周身骨痛及避開傷口，陪月更特地用咕及凳仔幫她做張抱仔專用椅。凡此種種，陳琪應該還是個肥媽咪?!原來個多月的瘦身秘訣就是湊女。「我返屋企幾日已經開始抱佢，絕不假手於人。好似佢試過喊足六個鐘都唔肯瞓覺，我就抱足六個鐘。我諗因為咁我瘦得快，夠晒運動量。」雖然口口聲聲話辛苦，但每當囡囡食飽飽向她甜笑，做媽咪的就甚麼都拋諸腦後了。
坐月黃金期 傳統×現代
剛才提及坐月傳統忌冲凉洗頭，為陳琪搵陪月及度身訂做坐月食療的康加慧有限公司客戶服務經理Canny講，以前是怕剛生完BB的媽咪凍親，但現在醫學昌明，只要留意幾點就一樣可以做。「好似洗手要用熱水或自備薑水，以免手指入風麻痛。至於冲凉同樣煲大量熱薑水冲洗，熄抽氣扇但又要保持空氣流通，之後亦要快抹乾吹乾。」
另外，適當運動可加速子宮收縮、腹部和骨盆等各肌肉回復健康，減少腰背痛及出現產後小便失禁的機會。謹記粗重工夫、蹲身或彎腰動作都不可以做。美其名坐月為一個月，其實100日內都是坐月黃金期，要因應自己體質加以調理，才能有最好的效果。
