【本報訊】「媽咪，你哋去咗邊呀？係咪匿埋咗呀？」沒有精神病紀錄的4歲男童，上月底獲流感診所處方特敏福，服用後精神錯亂、胡言亂語、認不出家人，及後更失去記憶，一度懷疑患上腦炎或腦膜炎，男童最後卻不藥而癒，醫院的文件顯示，男童精神錯亂相信與服用特敏福有關。藥劑師組織相信個案是本港首宗病例，建議醫護人員日後處方特敏福時，向病人及家長清楚解釋副作用。 記者：張嘉雯
彭女士的兒子上月出現流感症狀，向私家醫生求診，情況未有改善，兩日後到仁愛普通科門診，獲處方特敏福，兩日後確診豬流感。
男童在服藥期間曾出現視力模糊，完成整個療程後卻出現精神錯亂，「好似變咗第二個人咁，唔識講嘢、淨係識喊，語無倫次，唔係4歲小朋友應有嘅表現，所有功能好似冇晒咁，瀨尿，變到好似個BB。」彭女士大驚下帶兒子到屯門醫院急症室求診，被安排在隔離病房留醫。
曾問藥物有否副作用
男童入院後接受一連串檢查，但找不出病因，彭與護士閒談間，才得悉精神錯亂是特敏福其中一種嚴重副作用，「佢問我『乜你哋唔知有呢個副作用o架咩？』，跟手攞張單張畀我睇，我嗰時先開始懷疑係同特敏福有關，我之前喺流感診所有問過種藥有冇副作用，佢話冇，如果姑娘唔同我講，我咪一路都唔知！」
彭女士指，醫院一度擔心兒子患上腦炎或腦膜炎，多次注射抗生素，她及家人非常擔心，日日以淚洗面，「原本好好哋，接受唔到佢突然間咁，食飯又唔識，玩開嘅公仔又唔玩，儍更更咁，（入院）頭三日嘅記憶直情冇咗，係咁講『媽咪，你哋去咗邊呀？係咪匿埋咗呀？』，講說話又不斷重複，係咁話『我好急尿』，然後除褲屙，但係屙一滴咁多，叫佢唔好再講，佢停一陣又講。」
住院第五日，男童開始回復清醒，至第九日，醫生向彭女士表示找不出病菌，但無解釋原因，「佢話唔可以排除關特敏福事，不過就算關事都冇辦法，因為冇嘢可以幫到佢。」
院方向病人發出轉介信，記錄男童的病情，內容指，相信男童精神錯亂及語無倫次與感染無關，與過往服用過的藥物，包括特敏福及其他傷風感冒藥物有關。
彭女士不懂得醫學名詞，看到報章有豬流感女患者服食特敏福後企圖自殺的報道後，才恍然大悟，決定站出來，「我唔係想要錢，係唔想再有下一個受害者，應該畀家長考慮食唔食，你處方畀我我咪食囉，點知會食到儍啫，好得番就話，唔好得番你話點算，唔知會唔會有永久創傷。」
「個個都食咪黐晒線」
她擔心特敏福會影響兒子的長遠發展，要求取回所有醫療報告，「醫院淨係畀封信我，係驚我哋真係會追究，定係刻意隱瞞？我自己咁慘，唔想人哋都係咁，家全部香港人都蒙在鼓裏，個個都食咪黐晒線！」
衞生署表示，收到屯門醫院通報，男童被列作懷疑腦炎個案，署方暫未收到病人服用特敏福出現嚴重不良反應的報告。
香港醫院藥劑師學會副會長崔俊明表示，美國及日本均曾出現17歲或以下人士行為異常、神志不清的報告，認為情況值得關注，該會提醒醫護人員，在處方有關藥物時，要告知患者藥物的副作用，家長亦要留意小朋友服用後有否出現行為異常。
屯門醫院至截稿前未有回覆；醫管局表示，截至10月21日，共處方特敏福予19,911人次。
世界各地均有服特敏福後出現精神錯亂報告，當中又以處方該藥最多的日本為甚，當地有病人服藥後自殺身亡，當局已要求醫學界避免向兒童及青少年處方該藥；美日兩國亦指示藥廠在特敏福說明書上加上警告字眼。
男童精神錯亂示意圖
醫生處方前須評估利弊
【本報訊】微生物學家表示，兒童出現精神錯亂成因甚多，要證明是特敏福「惹禍」頗為困難，醫護人員需先排除患者受感染，才可推斷與藥物有關，一般的傷風感冒藥若服用過多，也可引致精神錯亂，醫學界處方特敏福前，會先評估利弊。
服過量流感藥也出事
香港大學傳染及感染中心總監何栢良表示，要證實特敏福導致精神錯亂並不容易，「冇一啲測試可以確實講到係關隻藥事，要靠醫生按照個時序推算，如果係食緊嘅時候出事，停咗就冇事，就容易啲估，但停咗藥之後先有事就好難講。」流感藥物服量多亦可以令兒童出現精神錯亂。
港大微生物學系助理教授黃世賢指，服用特敏福後出現精神錯亂的個案以日本最多，但仍沒有確實證據證明與特敏福有關，暫未知該藥對神經系統的影響；一般病人入院後，會接受腸病毒、疱疹病毒、腦脊髓液等檢查，排除病人受感染的可能性，才會推斷與藥物有關。
根據醫管局資料，特敏福會引起惡心、嘔吐、腹痛、腹瀉、頭痛、頭暈、眼結膜炎、流鼻血、皮疹等不良反應，此外亦可能引起肝炎、令皮膚剝落和潰爛的Stevens-Johnson綜合症及神經精神失調。
黃世賢認為，特敏福雖然有嚴重副作用，但情況甚為罕見，醫護人員會平衡利害，再作出處方。