香港記者又揚威國際。now新聞台記者李以莊，憑住四川大地震一周年特輯《不倒四川》，喺全球1,000多名記者嘅報道之中脫穎而出，勇奪今年歐盟國際人權及民主報道大獎。
評判委員會稱讚李以莊喺內地缺乏新聞自由情況下，成功排除官方壓力，將地震背後真相揭示畀公眾知道。
重返災區搜集資料
now新聞台話，李以莊同另一位同事簡學悕，喺地震一周年之後，用咗個幾月時間重返災區搜集資料，採訪失去子女嘅家長，揭露官方點樣打壓同拘捕尋找豆腐渣工程真相嘅災民。李以莊07年喺中文大學畢業，但係06年已經喺now新聞台做兼職記者。