夠Car事：41屆東京車展直擊（二之二）FT-86唔送豆腐做跑手

夠Car事：41屆東京車展直擊（二之二）
FT-86唔送豆腐做跑手

大勢所趨，電能或混能車種被力谷，不過一眾迷戀速度同操控嘅車迷唔使失望，因為踏足CentralHall嘅一剎，就會發現，高性能車種依然係焦點。先有FT-86豆腐車變跑車，再有V10引擎嘅L-FA，單係呢兩部已經夠滿足你所有期待。

記者、攝影：許維雅
鳴謝：皇冠汽車

全方位睇夢幻豆腐車新戰鬥Look。

喺東京車展CentralHall嘅正中，Toyota霸佔住展館最大位置，喺連同Lexus同Daihatsu展示出嘅霸氣足以顯示其日牌一哥嘅地位。焦點中嘅焦點，肯定係86！睇過《頭文字D》嘅都知呢架豆腐車有幾勁，不過大家亦知AE86只係被漫畫神話化，Toyota就將呢架夢幻豆腐車帶到現實，命名為FT-86，棗紅色嘅流線型跑車，吸取咗Subaru水平對向引擎嘅精華，以極輕車身、重心低作戰鬥賣點，呢部2,000cc嘅FT型成咁，仲點送豆腐呀。

■內櫳淺灰真皮配紅邊，而有點科幻感嘅儀錶板就最搶眼。

■車尾巨型擾流加同雙出死氣喉，強烈的戰鬥格，有新一代甩尾王風範。

LF-A單挑歐洲超跑地位

搶盡CentralHall眾人目光嘅，仲有LexusLF-A。之前幾年都仲係ConceptCar，等了又等，終於拍板喺2010年尾生產，全球限量500部，更即場接受預訂，售價約37萬5千美元（約三百萬港元）。4.8公升V10引擎輸出560匹馬力、480Nm扭力，加上帶點科幻嘅超級跑車外形、有點法拉利影子嘅車尾大玻璃，無論咩角度睇都極具令人驚嘆嘅魅力，一大堆人圍住佢睇極唔厭、趕極唔走，LF-A的確絕對有能力向各大歐洲品牌嘅超跑宣戰。加埋同場力谷嘅PremiumHybrid車LF-Ch一樣夠晒睇頭，打住高性能揭背混能車旗號，已經夠晒吸引力。