一直恨抱孫的大名集團主席林建名，近日不但將償做外公心願，喜事更打孖一齊上，其長女煒珊和二女煒琦齊齊有3個月身孕，明年4月林建名將一次過抱兩孫，肯定抱孫抱到手軟。
已故香港富商林百欣長子、現年72歲的林建名，近年積極進軍娛樂圈，旗下大名集團成功捧紅趙碩之，另外兩名女藝人陳若嵐（Melody）和尹蓁晞（Yumi），也分別因被非禮和被傳援交而引起話題。
預產期明年4月
不過，林建名最大心願其實是抱孫，他與兩名前妻育有煒珊、煒琦、煒珽和孝信四子女，雖然長女煒珊和二女煒琦已嫁作人婦，但兩人一直未有所出，恨抱孫恨到出面的林建名，早年遂以一粒重10卡的綠寶石作餌，揚言女兒若成功懷孕，便能成為這顆家傳之寶的得主。
據悉林建名近日終於如願以償，其長女煒珊與二女煒琦齊齊有3個月身孕，預產期同是明年4月。記者昨日致電向林建名道賀時，他喜孜孜承認說：「多謝多謝，佢哋（兩女兒）好努力喇。」林建名表示現時還未知道兩孫性別，但孫仔孫女他一樣喜歡，問兩女預產期是否明年4月？他說：「係就係，但二女早大女兩個禮拜。」
早前林建名曾表示女兒添丁可獲贈10卡綠寶石，現時兩女兒齊齊有喜，10卡綠寶石又如何分配？林建名開玩笑說：「咪切開粒石一人一半囉！講笑啫，咪一個大啲，一個細啲囉，第一個生就10卡，第二個生就8至5卡到。」採訪：戴彩煥