大廠家Ｒ到中環一行，搵左丁山傾偈，傾咗一輪之後，廠家Ｒ話不如一齊去食雲吞麪，之不過左丁山早已有約，十分唔好意思，但見時間未至，於是同佢一齊行入大道中「羅富記」，呢間係粥麪名店，大把人在門口排隊，好彩好快就有兩個搭枱位，廠家Ｒ好耐都未同左丁山坐得咁親密、咁接近，話我哋彼此應該有好感喎！好感？千祈唔好亂講，但羅富記嘅雲吞麪的確令人產生好感嘅，味道甚佳，唔怪得好好生意，歷久不衰。但係啲夥計態度就令人冇晒好感咯，一位阿嬸送兩碗雲吞麪埋嚟，大聲問：「係唔係你哋o架？」廠家Ｒ與左丁山正在傾緊偈，來不及反應，阿嬸已經喝一聲：「都唔答人嘅，派錯就唔好啦！」只得連忙講一句：「係，係。」
廠家Ｒ做慣優質Ｑ嘜，對此惟有苦笑，好快食完鬆人，下一次不知何日君再來。行出門口，佢話叫司機送左丁山去上海總會，連忙耍手擰頭，你估貪塞車咩，行路好過，一定快啲，而且當作運動，有益身心。記得曾與長者金刀Ｌ傾過，問佢為何到咗七十一歲，仍然聲若洪鐘，中氣十足，是否常吃補藥？金刀Ｌ話：「我平素絕不吃中藥補藥，亦不吃西方健康藥品，總之唔食飽，食得清淡。平時工作太忙，又有鋪癮揸手術刀，根本冇乜時間做運動，所以我一味靠行路，由中環辦事處行路去溫莎公爵大廈開會，在灣仔食完飯，又行路返上中環，平時唔揸車，多搭地鐵，一於靠步行，當作健身運動。」
金刀Ｌ經常精神奕奕，滿臉笑容，常云老人家最緊要保持心境開朗、積極樂頤年。見此快樂長者，忽然想起高錕，索性問佢：「你係資深西醫，究竟有冇研究打麻將對防止老人癡呆有冇好處？」金刀Ｌ答：「有冇真實好處我唔敢講，但我注意到打麻將對老人家有三大幫助，如果唔為輸錢激氣嘅話，就係（一）搓麻將令手指活動靈活。唐人比西人少啲手指關節炎，（二）有三人作伴，有講有笑，老人冇咁孤獨感到憂鬱，（三）避上家，誅下家，常動腦筋，思想可以靈活啲。」金刀Ｌ真係觀察入微，老人家好明白老人家嘅事務，由佢辦理安老事務，啱晒。