電燈膽政治殺傷力驚人。先有慳電膽搞到煲呔雞毛鴨血，連立法會大樓前日突然停電，經過通宵查察，發現再次衰喺電燈膽手上，原來畀三個壞燈膽拖冧成個立法會大樓嘅供電，睇嚟立法會好可能要率先響應煲呔，嗱嗱聲換晒慳電膽。
前日朝早11點幾，立法會舉行財經事務委員會會議時突然停電，會議廳冷氣同擴音系統即時停止運作，官員、議員無咪用，發言時要鬥大聲，個個變成巴士阿叔、巴士阿姐。
寸煲呔要換慳電膽
立法會秘書長吳文華噚日喺立法會內會解釋停電原因，話職員前晚通宵找尋停電源頭，最後發現，原來係由於有三盞射燈燒咗，「啲火撞落斷路器度，連個斷路器都燒埋，搞到電路供應總掣跳掣。」吳文華話，機電工程署今日會去更換啲壞燈同斷路器，又話兩者喺立法會都已經用咗好耐時間。
白鴿黨卿姐話，唔少市民都好關注立法會停電，已透過內會叫政務司司長唐唐，要對立法會嘅維修保養做好啲。社民連大嚿就不忘寸煲呔，話立法會今次可能真係要換慳電膽。